ياالله ياجزل الوهب والعطايا
تفكني من حزّة الهم والضيق
امشي مع العالم بحسن النوايا
مايوم لفّقت الاحاسيس تلفيق
على دروب الطيب احثّ المطايا
علّ وعسى يصبح للاحلام تحقيق
يقوله اللي صار قلبه شظايا
ليت الذي صابه على قلبه يويق
يشوف تاثير الزعل والخطايا
ويشوف وش حجم الغلا فالمعاليق
ياشمس صبحي والهوا والفيايا
ياجوّي اللي فيه حلّقت تحليق
ياسيدي ماني قصيف الحظايا
ولا من اطرف هرجه ارتاب واضيق
لكن طول الصمت جمر ولظايا
صمتك لهيب يحرّق الجوف تحريق
سوّيت في قلبي بديع السوايا
برّقت في نبض الشرايين تبريق
يامالك تاج الحسن والحلايا
وثقت قلبي في محبتك توثيق
قدمت لك نبضات قلبي هدايا
واحساس طال الغيم اثارة وتشويق
وانته توارى بالغلا فالزوايا
وتغلّف احساسك بعذب الطواريق
ماهمّك اصدر والمشاعر ظمايا
وابات واصبح طاوي وناشف الريق
حريص اجنّبك العتب والزرايا
عندك حصانة فالحنايا المغاليق