تو اشرقت يازيد شمس الحقيقة
ماعاد باقي شي يمكن تخفّيه
سيل الغرور اللي جمح مع مضيقه
جرّح ثرى واشجار واحجار واديه
واللي لسانه عن مراده يعيقه
فاته قطار الشوق ماعاد يمديه
اقول يابخت الطيور الطليقة
عكف المخالب كل مزبان تبديه
وانا بشر ماني حسيب الخليقة
كلٍّ على كيفه ورايه يقديه
قلبي وطن واقفال صدري وثيقة
ماكل ماينقال اجيبه ووديه
شاعر واحب الورد واعشق رحيقه
واكتب عبارات الغزل والشعر فيه
ايضا واحب الصعب وامشي طريقه
من خلقتي يغريني الصعب واغريه
الاّ السراب اخشاه واخشى بريقه
واكره صحاريه ودروبه وطاريه
ماني وهم خل الوهم في حريقة
انا الهلال اللي تشوّق مساريه
وين انت يوم ازهار قلبي حديقة
ضيعتها بالبعد والصد والتيه
وانكان في صدرك من الصمت ضيقة
مغليك في صدره عتاب ومشاريه
صارت تقاذفنا البحور العميقة
كلٍّ يجدّف ما عرف وين شاطيه
ويبات طفل الحلم مابل ريقه
ماكل غيمة ساقها الحظ ترويه