كلك نظر يامغرقِ قلبي اغراق
في بحر من شعر وفصاحة وتعبير
وين انت ساريبي على درب الاشواق
وانا تعبت من السهر والمشاوير
تقطف وتملا من ثمر صدري اطباق
يامهدر اشواقي بدون اي تبرير
خل الغلا يمسي على صدر الاوراق
وانته وانا والحب نصبح على خير
صحيح لك فالقلب طلّة ومشراق
شمسٍ تبدد ظلمت الصدر وتنير
اخيل حرفك كني اخيل براق
مع كل نوضة بارق افز واطير
لو طالت الرحلةحشى ماثْني الساق
ينصاك شوقي والنوايا مغاتير
لكنّي اخشى من عبث جرح الاعماق
نهار تغزيني جيوشه مغاوير
اثر الغلا نهاب والود سراق
حنشل على بيبان قلبي طوابير