غيبتك لو هي دقيقة تعتبر صدة
الوقت من دونك سجن وغيابك اسياجه
لا تعتذر لي ترى ما عاد في شدة
أعيد الحكي يكود الصدر مخراجه
دامه يوصف بجود أبيك وبجده
وشلون تبخل على المجروح بعلاجه؟
وشلون قاااوك قلبك رده وصده
مع انه بين عليه الضعف والحاجة
ياقو قلبك برد ايمينك ورده
بخلت بمصافحه وارهيت بحراجه
لو ما سقى غيم عينه جرهدي خده
تراه يبكي وقلبه يلحق أخلاجه
ولو شفته يمازحك تراه من جده
الضحك عن درب ضيق الصدر ماعاجه
غير الغلا والوله عليك وش حده؟
يا درب ليله ويا مسراه وسراجه
كنه يعرفك قبل يلقاك من مده
مع إن ما بينك وما بينه أمواجه
هواك بدو نووا للقلب بالشدة
ورياض قلبي لشوف البدو محتاجه
والوصل بحر متى أنت بتسمع ابمداه
السيف صبري وبحرك شح بأمواجه
قصيدي اللي قريته واللي أعده
قديم لا يزعلك معناه واخراجه
وفراغ قلبي غلاك ارهى على سده
ليتك تشوف الغلا وأبراجه وعاجه
أقوى رياح العذل ما تقدر تهده
وإلا الجفا لو تنفس هدم أبراجه
تغانم الوصل لن البعد لابده
ياتيك في يوم ثم يأخذك بأدراجه
اللي لي انك تلين وتترك الشدة
واللي لك اني ماسولف بك لهراجه
ولاني بزعلان واللي نرتجي مده
يا باب قلبي ويا قفله ومزلاجه
زعلة تغلي ومن تزعله من قده
مادام كل يبي دربك ومنهاجه
غالي وتبخل علي وتطول الصدة
الله يسامح غلاك ويلعن الحاجة