الدور ماهي زرفتين وشبابيك
الدور..صفحة نور ونجوم وأفلاك
احسها مثل الكفوف المشابيك
مثل البحر والناس...حيتان وأسماك
واخترت أمد حبال صوتي واناديك
ياالواضح..المجهول..ياالغامض..الشاك
الله يامسهل ومصعب معانيك
الله مامرك على القلب وأحلاك
ياما نشزت ودوزنتني اغانيك
ياما زعلت وكان يرضيني ارضاك
قبل المدينة..مدنتني صحاريك
قبل البداوة..بدونتني سجاياك
يالشيح عمك ياالخزاما بناخيك
ياالشمس تشرق بين شرقة ثناياك
قلت الغرق واستدركتني موانيك
قلت الضياع وقدت الروح ظلماك
مالي وطن ياكود داخل منافيك
مالي سما..خارج أشمالك ويمناك
سمعي فمي..سيرتك غابة مساويك
دمعي ..دمي مابين وصلك وفرقاك
تفداك عين ماترد النظر فيك
ويفداك قلب مايشوف العطش ماك
قلبك دليلك كل درب يوديك
الشوق زادك والنوايا مطاياك
صب السحاب وبلُل اشفاه ضاميك
وان قلت قربك طالبه قولي:جاك
والوزن وزنك والقوافي قوافيك
والاالقصايد قاصره دون معناك