جنين
قفلت ليه..
شبَّاك بيفْتح ع الحياة؟
وطلقت ليه دقنك كده؟!
الدنيا فيها ألوان كتير
بس بتعوز الرضا
فتَّح وشوف
دَ الشمس بنوتة بترقص ع الطريق
تزغلل عيون العاشقين
وأدى القمر عيِّل يشخبط ف السما
يرسم نجوم
ب إيديه يوزع خير ونور
يللا قوم
في بطن يأسك يتخلق أملك جنين
عيل عيونه ملونين
يكبر فيلعب بالمواسم ع الطريق
المركبة
عارفك جدع
تعرف تقود المركبة
لا الريح جديدة عليك في شيء
ولا دفتِّك لو تتكسر بتأخرك
قاوم هبوب العاصفة
مهما هتشد الرياح
إوعاك تسلم للغرق
افرد شراعك للنجاة
تحمي حياتك م الهدد.
فاضل كتير
مش قولتلك
ابدا وشكل م الورق شلال عرق
ده العمر لو نصه اتسرق
لسه اللى فاضل فيه كتير!
ليه تعيش اسير؟
وتضيع حياتك فى القفص
الدنيا لسه فيها خير
ولسه ما لغوش الضمير
فافرد جناحك فى السما
وافتح عيون الليل على الحلم الكبير
لو اتوجعت انسى وعيش
مفيش طريق للشمس بيه تنير الطريق
الا احتراقها فى السما
والنور نتيجة نار كتير
حاسب البشر
الناس ابر هتشك فيك تشككك
تفتح جراحك كلها
ما عدتش حاجة تفرحك
طاب أخترع سر الفرح
لو شوفت طفل بيبتسم
أو شوفت حلم بيترسم
او قسمة ليك بتتقسم
او قلب شاور مرة ليك
افتح عينيك
متقولش ان السكة لسه بعيد قوى
هتكون قوى راح تنتصر.