ايه اللى خلا الليل يخش قبل الأوان؟!!
والضلمة ليه فردت وجودها ع المكان
يا حبيبتى مش كنا سوا
قاعدين بنستني النهار
الدنيا ليه كده ضلمة
والكون ده صابه إنهيار
الشمس فين
الشمس مش قاعدة هنا
والبحر ليه
كره المراكب والسفن
طرد السمك
نزل الشبك م الصايدين
مطلعش تانى للهوا
إزاى كده
الطير يمل من الغنا
عصافير قلوبنا
إزاى تطير ومفيش سما
طاب وإنتى فين
مش كنتى قاعدة بين إيديا من دقايق
انا كنت فرحان بيكي ونجاح حلمنا
مين اللى سرق الأمنيات من بين إيدينا
مين اللى استكتر علينا
تفرح قلوبنا باللقا
مين اللى كتفنا كده
ومد حبل المشنقة