علشان غبى
وزعت عمرك فى البارات ع السكرانين
صبتلهم كاسات محبة مشبرة
ونسرت جسمك للى محتاج لقمة جاهزة
وعملت روحك مزة للمحتاج دفا
وقعدت وحدك تشتكى
فاكر بانك لما هتكون نقطة أبيض
وسط صفحة م السواد
هتبقى واضح للعيون
كل العيون عايشة فى عما
وكل القلوب اتجننت
هتعرف تكون
تعريشة للناس تحتمى بيها فى دخول المطر
أديك وحيد
وعرفت أنك مش نبى
او حتى متكلف بنشر نورك للبشر
عايش سجين جوه منك من سنين
وكل يوم
حته م الروح تختفى
عمال تدور ع الامل
وسط عالم مسطولين
كسبت إيه
خسرت إيه
التعادل مش فى صالحك
ملح جرحك ليك لوحدك
والصحاب ذكرى فى البوم الزمن
إيه التمن؟!!
نص عمرك راح هدر
لو بس قلبك كان حجر
إحتمال كان تنتصر
ولو تنكسر
تعرف ساعتها تستند
على كدبه تتسمى البشر
تقدر تلوم حد غيرك
او تعدى م الخطر
عشان غبى
واقف لوحدك
عطشان ومستنى المطر