صحيح انه كلام الشعر غير الفعل
وكم من شاعرٍ قالوا كتير ولا صدقوا
على الصفحات كأسطورة بتوصف ترسمه الكلمات
وبين القافية والقافية بتشهد للتاريخ أبيات
بأنه كان ولا ليله بيرضى يتظلم ويبات
تبات الدمعه (عَ) الخدِّين يا تفعيله
ولا يناموا بفضلك يا هوى ليله
يا طول ليلكم ..ويا ويلكم .. حقيقي تعانوا يا عاشقات!!
لكنِّي اليوم انا ناوى أكون بالكلمة متسلسل
يكون الفعل متصاحب مع الصورة
يكون للخوف معايا معاد اقول له بعاد
وبحضُن وردة لو ماليها الشوك
لكن بتفوح على الدنيا بأحلى عطر حرية
ولو بتروح "وراء الشمس" يا عاشق للوطن أحلى
أكيد هتلاقي حتى هناك جناين نور
بتبعد عن غيطان الكدب يسقيها فتطرح زور
ولو هينادي صوت جواك ما تسمعشي
ولو هتعادي كل الكون كشجرة تكون
وإيه يعنى يقص الشر فى فروعك
مادام جذرك فى أرض الحق ممتدَّه
هتطلع يوم فروع منها
تكون باصَّة بزاوية للسما حاده
تقول للناس:
بأنه يوم فى شاعر (عَ) الطريق عدَّا
ورغم انه كلام الشعر غير الفعل
ورغم انه كلامه كتير ما كانشِ صدق
فى مره كان من اللى بالكلام فعلوا
وقام ودَّع غيطان الزور فكان له صدقه انفع له
وقام ودَّع غيطان الزور فكان له صدقه انفع له