ألف رحمة
وجنة خالدة
في نعيمها يا عظيمة
ياللي كنتي روح وشاردة
مديا لأعمارنا قيمة
كل بالك في عيالك
مين سعيد ومين حزين
مانتي كنتي بيت ودين
كنتي دايماً تجمعينا
وإحنا كنا نقول آمين
تسألي عن حد غايب
تسألي عن حد حاضر
عندك خلق الله حبايب
كنتي دايماً تعزمينا
كنتي سخاءه وكريمة
كنتي تدينا الحماية
ولم تشاركي في الوليمة
فاكره لما كنت أبات
كنتي قبل الفجر تصحي
وانتي في عز التعب
تقولي ياللا أصحي يابني
عشان فطارك والعمل
كنت أقولك ما المنبه
ظابطه ياما ما تقلقيش
ولما آجي تاني أبات
برضو قبل الفجر تصحي
تقولي فطارك والعمل
أقولك ياما مالمنبه
تقولي يابني خلاص نسيت
نمتي ياما نوم ملايكة
دخلتك في القبر نور
كنتي ساكته أيوه عارف
بس واخده جواز مرور
الفضا ضلم ما شايف
خدتي كل جميل معاكي
خدتي كل الخير معاكي
يا سحابة خير كريمة
سبتي غصه يا عظيمة