نفسى يا ناس أبقى فى يوم شئ محترم
وارعى الغنم
ولو يوم هينطق فيه خروف
ينزل علي وش اللى جابو ميت قلم
سامعينى ياشوية جزم
الأرض ملكى والفلا
وأقندل أبوكم قندله
مش معضله
عرفتو أيه المسأله؟
إتلم منك ليه ياله
عشان تعيش على أرضى انا
ما تسوقش فيها الفهمنه
ما تقولش عايز اعيش انا
فهمت قصدى يا بجم
عايزك تكون زى الجماد
عايزك تكون يا واد صنم
فهمتو يا شوية غجر؟
واللا دى عايزه مؤتمر؟
تسلم أيادى مجدنا
تسلم ايادى اللى قهر
تسلم ايادى اللى قتل
تسلم ايادى اللى فقر
يا شعب يا شوية خدم
والله لتبوسو الجدم
يانا يانتو يا شوية رمم
ياللى فاكرنى رحمه ليك
وصدقتنى هحنو عليك
انا ليك عذاب وخوف وغم
أقسم بخوفو والهرم
ياللى إنت رافع كام صباع
لتعض صابعك م الندم