وياعودها--- ياإيد فنان
بكل حنان --- نحت مرمر
بريحة المسك والعنبر ..!!!
ياوردة بتحيي عنقودها
على خدودها --- افوق وأسكر
ومين يتحمل المنظر ..!!!
ياعود ياسمين --- طرح رمان
ياترتيلة ف دعا الكروان
ياسحبة قوس --- ف حضن كمان
يامهرة وجاية تتمخطر ..!!!
طريقك بالعبير مفروش
بترمى الضحكة تملى وشوش
يافستان الفرح منقوش
بلون الضى ومعطر ..!!!
لانا فارس ولا رحال
ولاشاعر ولا قوال
ولاعندى كلام يتقال
ياريتنى بجد كنت اقدر ..!!!
واكتبلك ديوان مخصوص
لا أبنودى ولآ ابن عروس
ويصبح للأحبة قاموس
يفيض بالعشق ويعبر ..!!!
خودينى بس على عيبى
وماتبصيش لألاعيبى
انا عيبى يادوب جيبى
لكن راجل ومتقدر ..!!!