مش بعيدة .. لو صحيت
جوه نفس البيت .. لقيت
هما نفس الناس معاك
وإنت وحدك .. حد تانى ..!!
بص "ع" الصورة "ف" مرايتك
بص "مقق" ..!!
هو وشك .. وللا "شقق" ..؟!!
بص "ع" الإسم "ف" بطاقتك
بس "حقق" ..!!
قلب الحدوتة وإسترجع حكايتك
إنت .. إنت ..؟!!
وللا فعلا .. حد تانى ..؟!!
ده إنت زرعك .. مش شيطانى
بس شوف .. مين اللى أصدق ..؟!!
بص .. وإسأل .. ليه قرارك ..؟!!
مش قرارك .. بس بيحدد مصيرك ..!!
بنت .. بتعفرت .. نهارك
بس نايمة "ف" حضن .. غيرك ..!!
حتى صورتك "ف" المراية
ليه بتشبه .. حد غيرك ..؟!!
نفس كاس الهم .. شارب
نفس قرص الدود ولدغات العقارب
نفس لسع النار ونفس الجرح ضارب
جوه روحه .. للنخاع
نفس حالتك .. "ف" الضياع
واللى باعك ..
هو ده نفس اللى باع
قبل منك .. ناس كتير ..!!
كلنا .."ورث" .. ومتاع ..!!
والخديوى هو .. هو ..
بس بيغير قناع ..!!