الصورة رغم المكياجات

الصورة .. رغم المكياجات

متشوهة ..

بيطل حزنك منها ..

ويوبخك ..!!

إحنا ف "كده" ..

أو "شم" ورد ..؟!!

لزومها إيه المنظرة ..

والدنيا برد ..

ولسه عزم الريح .. صريح

بيهد صرح الأمنيات ..

قلبى اللى مات مصلوب .. مسيح

بيمد إيده للسما ..

يسحب نفس ..

بيشق سدرى وهو داخل ..

وأكتمه ..

محتاج ونس ..

من غير ما تتمد الإيدين ..

وتكممه ..

انا لما خبى الجلد عضمى ..

وكمكمه ..

كان كل خوفى "ل" ينحنى ..

ويبان موطى ..

ف وقت غير .. وقت الصلاه ..

كان خوفى أكبر مشكلة

ممكن تصادف أى حد ..

إزاى تخاف من حضن أمك ..

حد فيكم عنده رد ..؟!!

الشمس بتموت "ف" العيال

مع إنها .. قاطعة الخلف ..

وإنتى اللى عايشة بالسلف

عاوزة العيال ..

والحب عندك .. مختلف ..

زى المصايف .. والمراسى .. والشلل

زى البيوت المسقوفين

بردى وصفيح .. جنب الفلل ..

زى نفس الفرق بين ..

"أوبن بوفيه"

واللى بتسخن بواقى الأكل

وتغطى الحلل ..

علشان تكمل .. شهرها ..

هو نفس الفرق بين

إبن اللوا ..

واللى عايش ع الخوا ..

علشان يكمل مهرها ..

متناقضات ..

الوان بتقتل بعضها ..

وأنا بعترفلك ..

إنى من كتر السؤال

مليت ف عرضك ع الشاشات

كتر الترف ..

وإحنا اللى من كتر القرف

معظمنا مات ..

طعم السكات ..

يشبه لطعم النغنغة ..

والدرمغة .. ف الديسكوهات ..

غزل البنات ..

سارح على الكورنيش

بيحلم بالشرا..

وإنتى ف مطاعم "أمريكانا" ..

بفجر .. وبكل إفترا ..

بتبيعى احلام البنات ..

متناقضات ..!!