قفلتى الباب

قفلتى الباب..

ما صدقتى..

قلبتى الآية وزعلتى..؟!!

خلاص ماشى..

خلاص ماشى.. خصام بخصام..

تعالى يلا نتحاسب..!!

نشوف مين فينا كان غلطان..

ومين ع التانى بيحاسب..؟!!

ومين زارع ف روحه غيطان

بتطرح صبر..

أو صبار..

ومين ف البعد باستمرار

بيبلع علقم الحيرة

تمرر جوفه.. وتعلم

لا جاب سيرة..

ولا إتكلم..

ورافع رايته ومسلم..

عشان ما يشوفش تكشيرة

بتخطف من عنيه الضى..!!

مسلم روحه للغيرة..

تدوس على قلبه

رايح.. جى..!!

لا موت.. بيموت ولا عايش..

عشان مع جرحه متعايش

وحبل وصالك البايش..

يا دوب على قد تكتيفه..

كأن الحب.. تعريفه..

ما بين قلبين.. بيتلخص..

ف قلب يموت من الحسرة

وقلب يعيش على كيفه..!!

برغم إنك أحن كتير

من الصورة اللى رسماها

لمهرة بتعصى ع الترويض

حقيقتك وإنتى ناكراها.

براءة عيلة ف روضة.

بتجري من نقيض لنقيض

وتاعبة القلب وياها.

وروحي معاها ساحباها.

وفيها شقاوة العصافير..!!

تطير تجرح

تحط أفرح

تلّقَط حُبي.. تتشبّع فتتمنّع

ولما تشوفنى بتشجع..

بتسيبلى القفص..

وتطير..!!

يا قسمة قلب عاش عمره

بيكره غربة المشاوير..

فلا حلمه اللى متفسر

سند روحه..

ولا قربك يرده بصير..

برغم وجودك المحتوم

ف تكوينه..

ف كراسته..

وتدوينه..

وروحك راشقة ف التفاصيل..

وأنا والليل..

بنتهجى بزوغ فجرك..

ندى الصبح اللى من ريقك..

جمال ضمة صباح الخير

لخد الورد ف إيدكى..

وف عنيكى..

براح الصيف..

ف عز البرد..

شوارع م الحنين تتمد.

على طول المدد والشوف

أنا قارى الهزار م الجد

بس بجد..

مش شايف سبب للخوف..

لا أنا الماضى اللى باعك يوم..

عشان غيرك

ولا جاحد.. نكر خيرك..

ولا أرضى برغم تأثيرك..

أكون لك..

لو تكونى.. لحد..!!