ما تكحَليش ف عيونك الضحكة
خلّىِ الكلام من غير حَرج يُحكىَ
طاب يُحكى أن وقد ما يُحكىَ
مافيش كلام يوفيكى يوم حَقِك..!!
ما تزوقيش الورد فوق خَدك
إِسقيِه مودة يبان على قَدِك
وتبانى زى زمان ومين قَدك
مترصَصَة الخُطاب على السِكهَ..!!
خلّیِ الكلام من غير حَرَج يُحكیَ..!
ما تقربيش الروج من الشِفّهَ
واللولى ع الصفين بيتدفى
آن الآوان للطُهر.. والعفة
ده الشارع المكبوت على تَكّهَ..!!
خلّیِ الكلام من غير حَرَج يُحكیَ..!
ما ترسميش تاتو علی الحاجب
سيف الهلالی ع العيون حاجب
فارس وحارس واللی مش عاجب
يشرب من المالح.. ويتِكّه..!!
خلّیِ الكلام من غير حَرَج يُحكیََ..!
وما تلبسيش الكعب م الهزاز
باالله عليكی الناس قلوبها ازاز
ح يجَرّحوكى وانتی بنت عُزاز
ما تحِمليش م السو لو شَكه..!!
خلّیِ الكلام من غير حَرَج يُحكیََ..!
ولا تلبسيش فستان ومتحزق
قلب الولاد عصفور وبيزقزق
قومی افتحی للفجر بيشقشق
دی الشمس عايزه تهِل من عكا..!!
خلّیِ الكلام من غير حَرَج يُحكیَ..!
خليكی زٍی الفرح شئ قادر
يعدِل مايلّنا.. حتى لو نادر
قلبي نصبته.. للفرح شادر
وداس عليه الحزن.. وإتِكّه..!!
سيبي الكلام من غير حرج يحكى..!!