دم الحمام
سايل على جبين الوطن
من ألف عام
دم الحمام
سايل على جبين الوطن
لما اتسجن فينا الكلام
لما اتولد جوانا خوف
من كل شئ
وكل شئ أصبح بكام.
غية حمام وقلوب حجر
والبندقانى بينتظر
يصطاد حمام..يصطاد بشر
والمشهد المكتوب فى عز النهار
ماهوش جديد
من قلب قلب الموت راح تتولد
صرخة شهيد
نصبوا المشانق فى البلد يا دنشواى
والموت أكيد
كل المشانق من ورق
أقلام..رصاص
وحروف بتستنى الخلاص
تكتب ميلاد
تكتب وفاة
تكتب أوامر إعتقال
تطرح سؤال
إزاى يريحنا البكا
والجرح فوق الإحتمال؟
من ألف عام يادنشواى
وجيوش وشوش غير الوشوش
اتغيرت فيكى المعالم والسكك
بس البشر ماتغيروش
خلص الكلام