ريحة
الأحزان..!!!
دمعة جاية.. دمعة رايحة
مركب الأحلام.. غرق..!!
والسنين ع الخد سايحة
عمر خايف.. يتسرق..!!
موت.. وريحة الحزن فايحة
واللى زعلان.. يتفلق..!!
شيل يا ناعى الهم شيلتك
إمتى ضهر العيلة نخ..!!
شيل يا عم وعدى ليلتك
بس حاسب تبقى فخ..!!
وانت واقف وسط عيلتك
عيب عليك لو قولت أخ..!!
انفض القلب اللى عبى
من مرار الجوف وزيح..!!
ليه ف حزنك تستخبى
وأنت وضعك غير مريح..!!
لو واربت القلب حبة
يا بنى جايز تستريح..!!
سكتين.. مالهومش تالت
اختيارك.. بس ركز..!!
لو عيار الحزن.. فالت
قلب طيب راح "يعكز"..!!
لو قصور الحلم.. مالت
خد قرارك.. يلا "نفذ"..!!
ظرف طارق بس طارق
كان مصحصح ماتظرفش..!!
قلبى يمكن عقله طاقق
بس عمره ماخدها قفش..!!
واللى شاف الحلم عايق
بكره يوصل لو ما خافش..!!
قلب عاقل.. قلب طايش
كلنا ف السكرة طينة..!!
"ينى" لبسنا الغوايش
وإحنا صدقنا وطاطينا..!!
موتنا بس الجرح عايش
لما علينا ف واطينا..!!