لك بقلبي شي غالي ما أظنّك تعرفينه
شي ضاهى في غلاته المجرّه ومحتواها
تسأليني وشو؟.. لحظه!! إنتي فعلاً تجهلينه
تجهلينه لأنه شيّن سالبن روحي هواها
إن بغيت أقول حبن فإنتي حبّي تملكينه
وإن بغيت أقول صفحه فإنتي أول من طواها
وكان هالحيره بقلبك نار فإنتي تشعلينه
جمر حبّن من لهيبه زوّد بروحي ظماها
المحبه والمودّه والعشق لي ترتجينه
جالك الليله هديّه ياللي ما قلبي لسواها
جالك الشاعر يلبّي لو بلحظه تطلبينه
قلتي يا شاعر أمانه.. هل لروحي مبتغاها؟
قلت جالك يالأميره كل ما كنتي تبينه
وإن تبين المستحيله.. سقت هالقمره وضواها..!
يا ضوى قلبي ودروبه يا حياتي لا تجينه
قلبي اللي بك تولّع وأصبح ل سلوى سلاها
يا بعد منهو إذا أصبحت أقبّل له جبينه
ويا بعد منهي إذا إني أمرض تنثّر لي ماها
يا بعد كلي ونفسي يابعد شاعر بإيدينه
يكتب حروف القوافي صادق بنيّه نواها
نيّته ما يحب غيرك لو بيومن تتركينه
ولو حصل إنا إفترقنا إتركوني في هواها