الرغبة طلقة نار
بتخرج من سجون البدن
تعبر جسور الشجن
ف ابتهاج مفتعل بالانتصار
يتلاشى
مابين الفرق ف التوقيت
أو عدم اقتناع الاخر
بالدخول ف المعركة
عيونك سموات صمت وقلق
وشفايفك لحظة حضور عنيفة
ياترى هيعلنونى ف الملكوت
نبوءة نبى
ولا يادوب مملوك غبى
بيلضم نجوم حزنك
على بدلة التشريفة
ف دواير الاحتمال
احتمال
باكتمال دواير اللغة
بين الرغبة
والخوف
والاندهاش
واللى مايفهمهاش
غير بس اللى عدت خطوتة
برة الدواير
المسافة بين رفضك المبكر
واستسلامك الغبى
لادغدغت عطش الرحم فيكى
ولا هونت عليكى
طلقات الولادة
يوم رجوعة م السفر
قطع جواز سفرة
والشال اللى كان تؤامة
وقرر يسافر كل يوم ف الناس
فجأة!!!!
ابتدا يلملم قصاقيصة البسيطة
اتبرع بحبة القديم... واختفى
لما احتجت السفر فيكى
دخلت حروب مابين رفض وقبول
وشربت من بحر المعانى سنين
ولما احتجت الخروج منك
ماخدتش م الزمن المهول
غير كسر ثانية
وكلمتين
امتى هتصرخ عيونك الطاهرة
بنظرة فيها اختلاف
توصل معانى الائتلاف
تدب الحياة ف الحياة
واسمع آدان العشق
ف رقة ضحكتك
وانتى صاعدة تحضرى
حفلة التأبين
خرجينى من عروقك
جرحك
سادد كل الطرق حواليا
واللى باقى منك
يادوب بواقى
مش هيطهرو الحزن
اللى ساكن فيا
ف المشهد الاخير
من انفعالك المهول
لحظة اكتشافك حقيقتك
وقبل انهيار رتوش الماسك
من عرق الذهول
خرج من عينيكى نظرتين
كانوا برة النص
ف المثلثات المربعة
دواير متوازية الاضلاع
ومربعات حادة الزوايا
وبقايا من معطيات افقى
ومطلوب رأسى
ماتندهش
لايتهموك بالذكاء