وينك؟ .. ذبل صوت السهر وامتلى ياس
وانا على بابه جريحٍ يعاني
ما كن هذا الليل له حد وقياس
ولا كن ساعاته تعزف الثواني
الشوق لامن وقّع .. يطيّر نعاس
عينٍ تبيك .. ولا تبي شي ثاني
وانت تعرفني زين .. شاعر .. وحسّاس
واللي على قلبي يقوله لساني
هي جملةٍ وحده من الراس .. للراس
لا غبت عني كل حزنْ يغشاني
واحس كن القلب بشويش ينداس
باقدام غيباتك يابو قلب جاني
ما كنه الا غصن وغيابك الفاس
ولا كني الا ضايعٍ في زماني
أوراق عمري كم لها منك يبّاس
واللي طواها في غيابك طواني
وان كان ما صدقتني يا اقرب الناس
عادي! ولكن حط نفسك مكاني
ابك انت لو في داخلك ذرة احساس
ما كان زايد في غيابك يعاني