اللي حلم يلقى حبيبه بصدفه
مرّ اللقى من دون ما يخلق اصداف
واللي تعب ياخذ من الصبر شفه
عيت عليه سلوم طيبه والأعراف
يا صاحبي لا تورد القلب حتفه
من سبتك وردتني كل ميهاف
لو عدل وصلك راجحً دون كفه
ماصحت وينك راجيً منك الإنصاف
ذبحت بوحي يوم يغريك عزفه
أجرمت بإحساسي ليا حد الإتلاف
ينخاك منهو ذابلٍ فيه نزفه
حاديه ضيم اللال من عمر منلاف
بحر الغياب ازداد بالهجر عصفه
متشبث بلوح الأمل دون مجداف
شاعرك ذاب وذوّب البُعد حرفه
ماله جدى ياكود ينزف لك القاف
فيك القوي ما بيّن اليوم ضعفه
في حبك انتي صار خيال الأطراف
جيتي وورد الشوق يزهاك قطفه
رويته بروحي ليا حد الإسراف
انتي بوجهي لو قسى الوقت ظرفه
في ذمتي ما يلحقك مني خلاف