سيد الجواري الكِنَّس اسْتَام
روحي ومَلَّكْتَه بلا بيع
لو طاعت الخِدّام الاعمام
ما ريت مِثلي فِيْ الهوى مطيع
له فِيْ الأمر جِدّامْ جِدّامْ
لو يِعْتِرِضْ لِي الموت ما شيع
لو لَبَّسنيه فِيْ الأسد خام
بالبس وفِيْ الكِلّهْ مَرافيع
لو قَالْ لا تِشْرَب ألف عام
بظمى ولو بين الزّرَارِيع
إلا ان سِقاني تَحت للثام
مِنْ خَمر ريجه لو تِجَنِّيع
صَبري جميل والحِبّ هَدّام
لَي هِدَم صَبري بلا توَدّيع
خَلّاه هِبا مَنثُور واعدام
وقَوَّى المحبَّه والتِّوَلّيع
لا تْلُومِني مِثلي مَا يِنلام
واللّوم فِيْ اللي مِثْلي يضيع
هَلْ كيف يالعذَّال يِنْلام
مِنْ وَدَّع السَّلوى تِوَدِّيع
قَلْبي حِجَر حِبَّه ولِغرام
بِمّا يتابِع لِك مَرَاييع
والّا بْهِيامي يِغْشِم اغشام
وحداني ما لِهْ غيرك ربيع
مِعتَز عَنْ ديرة اللّوام
لَو دارهم خِضْر المرابيع
ما يِخْلِفَه عاذل ولَوَّام
لَو قالوا خَلّ الخِلّ مَا يطيع
حب وغَرام وعِشْق وهيام
الهِن عَلَى قَلْبي مساطيع
سِنّه اثنَعْشَر عامٍ وعام
وستّة شْهُور وسِت اسابيع
على هدر دَمّي للاحشام
وَقَّعت امية ألف تَوقيع
لو ثاروا اخوالي ولعمام
دَمّي برايَه فِيْ الهوى يضيع