أهلاً عَدَد صِدق المواعيد
واعداد ما تِنْكِتِم الاسرار
واعداد ما تُوجَد تقاليد
واعداد تاريخٍ وتذكار
واعداد خَفق احرَارٍ وصيد
واعداد مَا حَلَّنْ عَلى الاوكار
واعداد حَطّ الإيد عَلى الإيد
للعهد فوقِن يَد القَهَّار
وعداد خَبط اللّيد بالبيد
عِسم الرجاب ويِمن الامهار
واعداد وصلٍ فيه تسديد
واعداد مَا الموشين تِنهار
واعداد وحدَة هَل التّوحيد
واعداد ما قَاتلوا الكُفّار
واعداد شَمّ اردِن وتَنْهِيد
وبَسمَة عِتاب ودَمْع مِدرار
خطٍّ لِفَاني مِ الإياويد
اللّي فضلهم عَمّ لقطار
مِنْهُمْ تعَلَّمْ مَدَّتْ الإيد
حاتِم وحاز الكَرَم والكار
اسرَف تَرَف واشرَف تِقَاليِد
كبار هم وانفسهم صغار
تِشهَدْ لهم كِلّ غَزْوَة الغيد
والسَّرْج والبيدا ولِكوار
عَهْد الشَرَفْ لِهْ وفا وتَأكيد
وضدّ الشرف للعهد غَدَّار
يِسْمَحك راعي الكَرَم ويعيد
ولبخيل ما يِسمح ولو هيار
اسعَد سَعَد نَصر المسَاعيد
لَيْ يقهرون العدو باقهار
افعَل فَضل لو فِعْلَه مكيد
ادّ الكرم حَقَّه وخِذِ الثار
اجمَل هوى واشرَف هوى الغيد
لَيْ بالشرف صافي مِ الاكدار
والهيِر نيرانه مُواقيد
والوصل جناتٍ للابرار
إيهاب شَنٍّ للتِّبَرّيد
وإيهاب شَنٍّ صابه اعصار
شتَّان بينِن فَرقٍ بعِيد
شَن نِحس صار وشَن سِعِد صار
ظِلّ القَرَط فِيْ الحرّ مَا يفيد
ما باه عَنْ ظِل هَنْبا وصِبَار
وظِلّ السِّدِر والغاف تَشيِيد
يغني عَنْ اعلى فلَل واسوار
دِرّ العقد يِخجل مِنْ الجيد
ومِنْ الرّوايِب خجل الازرار
واليوم عَنْ نَظم المنَاشيد
شَلْ مَركبي السيري مِ الابحار
اطلِب عذركم يَا الأياويد
واطلب عفو الخالج الغفّار
ويا سالم المزروع شِ تريد
آمِرْ ولا نخَالِفْ لِك اشوار
وسعيد لِهْ شَفّ وغَلا يزيد
اللّي بوجودَه زانت الدار
اشرَف علاقاتٍ وتَسديد
بقِوّه وثباتٍ ما الفَلَك دار
مَحروز عَنْ كيد الحساسيد
سالِم وعَنْ كِلّ عدو غَدّار
الخضر يشكركم بتَوكيد
ويَثني الشكر والحمد باعذار