ياناشدن عني ترى حالتي زفت
كل المشاكل فوق راسي تهافت
عيني تتوق النور لكنّ ماشفت
الله ياخذ شوفها.. كان شافت
انا وهمّي ياوليفي توالفت
نفسي ونفسه غصب عنّا تصافت
مبطي اذا شفته لفاني تأففت
واليوم عن شوفه عيوني تغافت
لولاه عادي ماتبسّم وسولفت
شف حشد جيشه فوق صدري توافت
شفني مع جروحه عطفت وتلطّفت
تدمي بعضها.. لو بعضها تشافت
الخوف ماهو جرح ياصاح لو خفت
الخوف ناسٍ من ورايه تخافت
وانا بصمتي عن غثاهم تلحّفت
وقلوبنا عقب التقارب.. تجافت
لو كان شيٍ في حياتي تحسّفت
فسنين من عمري تعدّت وطافت
فيها على الطيبه ندمت وتأسّفت
ونفسي من الدنيا تخلّت وعافت
ياهم مايمديك مسرعك شرّفت
عدت الزياره واصبح الوضع لافت
ليتك معي ياهم غبت وترأّفت
تقطع وجيهٍ وين ما امشي تلافت