اوهام قلبي ضيّعت عمري وطار
وانا احسب ان العمر يحفظ زهوره!
واليوم ماباقي من الوقت تذكار
كود الهموم وجرح ينزف وصوره!
الحلم ميّت والمعاذير الاقدار
والصبح فارق محجر العين نوره!
حلم الغلا ومعانق الروح واسرار
باتت على عيون السهاد إمحظوره!
ياللي تدوّر من ورى جرحك.. اعذار
ولا عاد تفرق غيبته عن حظوره!
مالك على وصل المعاليق مقدار
روّح عسى تلقى مع الارض دوره!
اسج عن دربك ولو صار ما صار
مثلي على درب المفارق صبوره
وهذا نصيبي ردّني لبوح الاشعار
اسلّي الخفّاق واجبر كسوره!
ماني من اللي يندب الحظ لو جار
ولاني من اللي يستهان اب عبوره!
لاعاد تنشد عن سواليف واخبار
معك تبلّد كل قلبي وشعوره!!
لو كان باقي من التفاصيل تذكار
ماغير جرح وكم دمعه وصوره!