لا جيت ابكتب قصايد شدّني احساسي
وغصباً علينا جروح القلب نلمسها
ياما مشينا وقطعنا بعاد الارماسي
باقدام وجلى ونجم الليل حارسها
اخفيت همي عن احبابي وجلاّسي
واثر المواجع جميع الخلق تونسها
هذي حقيقه فرضها وقتي القاسي
كم لي اقاوم طعونه واتحسسها
لارض السعاده رحلت ابا اختبر ياسي
والمشكله تهت واخفتني فهارسها
محصور كل التعب.. من راسي لساسي
من ضيقةٍ في حنايا الصدر.. اكدّسها
عرفت معنى الصبر من ثورة انفاسي
سلطة جموحي على الزفرات امارسها
ارهقت قلبٍ: عروقه: جرد يبّاسي
ياشجرةٍ تحتضر بيدين غارسها
في ذمتي ما شكيت.. ولا انحنى راسي
والالسن اللي.. على الهفوات.. اخرّسها
حكمه تساوي في عيني وزن الالماسي
اهل المجالس تقدًر من مجالسها
اللي شرى عزتي يبشر بنوماسي
واللي خذلني عساه النار يوجسها