شدو بدو قلبي عن ديار قلبك
والبدو لا شدو عن ديار يبطون
واليا انشدوك الناس وش كان ذنبك؟
قول : البدو لاعافوا القاع يمشون
أقفت إركابي ماتبي عذب شربك
طبع الكرام ان شافوا الضيم يقفون
على الهماج آرد ولا آرد ل/ عذبك
في سلومنا المقفين عيبٍ يردون
للشرق دربي ان كان للغرب دربك
ماعاد تجمعنا مدينه على الكون
راحل وتارك لك { غرورك و كذبك }
يمكن بقربك عن غيابي يسدون
ضيعت اجمل وقت عمري بجنبك !
ضحيت يوم ان الحبايب يضحون
بس انت ما تستاهل أبقى بقربك !
اشك ان لك قلب وإحساس وعيون
وقفت مثل السيف صامل بحربك
في موقفٍ حتى القرايب يصدون
ويوم الله أمّن خوف قلبك ورعبك !
خليتني مابين ( ضيقات وظنون )
والحين ابرحل وانت ابخص بذنبك
والجرح يتشافى مع الوقت ويهون !
شدو بدو قلبي عن اديار قلبك
والبدو لاعافوا لهم قاع يمشون