ويمرّ الليل وف جُعبَة (ظلامه) دمع عين وباب :
رمى خَلفه فضا شيّدْ من هموم الزمنْ دوله
يمرّه والمرارَه تَجرعَه وجْروحَه الأحباب
تزفه ل السَهَر يوم السَهَر : أَسْرَج له خيولَه
على ( كثره) عَجَزْ يلْقى ل حزنَه فيه "يد اصحاب "
على "قل الوفا " مدّ الوفا ل احزانَه تقولَه
كثير اللي زرعهُم تحت ضلعَه والأملْ ماغاب
كثير وما حَصَد غير الجُحُود وهمًّ يْنوله !
لقاهم / يوم ضاقت به سنينَه ضحكتين وناب
غَرس ضيق المدى في وحدتَه وارخى لهْ سْدوله
على كثر الوجيه اللي تمرّه / كلّها أغراب
على كثر إنهمارَه / ما لقى إلا (الجوعْ) محصولَه !
نسى نفسَه كثير ولا لقى غير التعب / جلباب
يلَحَف صبره اللي جرّه ل أحلام مجهوله !
سنين وصمته يلفّه وحزنه داخلَه ينساب
سنين / ويقهر دموعَه سنين /ويكرهَه زوله
سنين وآه ياذِكرى الحنين الصادق الكذّاب
سنين وآآه ياظُلم الغياب اللي إرتمى حولَه
سنين ويارتابة وقته المتوجّس المرتاب
سنين وياه يا احلامً بقيد الصمتْ مغلوله !
كأني : لوجهلتَه أَعْرف انّه وجه عمرً ذاب
لجل يحصد محاصيلً ب (دمّ) الدمع مبلوله
كأني : لو عرفتَه ماعرفتَه غير : شبً شاب
من جروحً بنت للحزنْ من بين أضلُعَه دوله !