عبير وتعبر اللهفه بك حدود المدى لل آه
وأضمك غربة /مسافر لقى في موطنك حتفه !
عبير وجيتك مهاجر يْحطْب من السنين خطاه
مسافاته حنين / وضيقه الممتد من خلفه!
شبابيكه تنادي للصباح اللي ظلم : مسراه
شموعه ماتوانت تشحذ المقتول من عطفه
على إيقاع حزنه يكتب المسلوب من ذكراه
حسب توقيت دمعه يطلق المسجون من حرفه
تعب وجه الزمن يمحي ملامح بسمته / يقراه
حكايه من ألم ترجي من غيوم الأمل نطفه
كثير يقول بكره / بسّ بكره دائماً ينساه
يصوّت للقا / تُشرع بوجهه للهجر شُرفه
وحيد يعيش في نفس المكان اللي سكب فرقاه
يغنّيه الصبر موال جرح بارع بعزفه !
كذا همّه تكوّر وإستباحت ضيقته دنياه
كذا حلمه (نما) في داخله و(إغتالته) ، (صدفه)
كذا عاش الحياه بلا حياه ولا لقى مرساه
كِذا خانت مشاويره : دروبه / وإنتصر ظرفه
سقى الغربه مواويله / وجاذبه الغروب غناه
قبل يدرك حقيقه ان : صدقه جزء من ضعفه
حكى صمه سَهَر يوم الكلام اللي وقف ب اشفاه
عجز في عزّ حاجة ضيقته للبوح يقترفه
شموعه / حزنه المتناثر بداخل مداه / أشياه
شحوبه / إمتعاضه/ كلها للناس تعترفه
خطاه أنه وفا يوم الوفا محدً قدر يرعاه
خطاه إنّه ذِكر يوم المواني نِسيَت تْعَرْفَه
بذر للحب صدقه والوفاء / لكن عجز يلقاه
حصاده - آه - تغتال الكلام ويختنق نزفه!
وربّك ياعبير الحال لو ينطق ،، صرخ : أواه
من حمولً تثاقلها الزمان وشالها كتفه !