خبى إنكسارك
وإصلب فى عودك
وإحتمل تعب الوقوف
وإعمل كأنك
واد عفي
ولا فِيكش خوف
ولو تدوق
فى الأكل سم
قول عسل.. خليك رؤوف
وإن قالوا
شارك فى الجنازة؟
خد معاك حبة دفوف
سنيد..يجوز..ماسح لكوخ
أو حتى صوف
خبى إنكسارك..
وإوعاك تشارك إضرابات
بتغنى أووف
وإرسم على جناحك رِيَشْ
حتى وان..
شالها الحرس
بالنَتف أو حتى الحفوف
خبى إنكسارك
الطير فى سجن الإنهزام
لا منه طاير فى السما
ولا منُه نام
واقف على.. شباك حياته..
فارد جناحه بالغُنَىَ
يدخل لزنزانته ينوح
م العصا..
وضغط اللجام
زى البهيم ف معاملته
والإسم قال
ياناس حمام!
حمام...يمام!
لو كان حيسمع الكلام
وينسى راح
من عمره كام!!
ويفوت حيائُه تحت رجله
يسقط..ويسقط
وإياه يقول...
فكوا اللجام؟!!!
إتفك غصب.. حزامى منى
حأربطه
وأقول تمام
الطير
فى سجن الإنهزام
ينحت بمنقاره فى صخر
لأجل يبحث عن حبوب
لجلن ما يشبع
أو ينام
والسُوس بِينخُرْ
وربى يستُرْ
فى عز ضوء الضُهر يسحب
لا حر شمس بلدنا هَمُه
والرَشْ لو حترش..
سِمُهْ.. عَمَالْ يسرسب
فى الزوايا
كل زاوية..
تخُر منه
وهو ينخُر
يارب.. امنحنا السلام
خبى إنكسارك
وبلاش تفكر فى الحاجات
اللى تِنَغص
عيشة أبوك
وأبنك وأخوك
وياالله نلعب
سَند مَد
قوى العضل
يمكن يكون
ماوصلش لسه للتيبس
والتصلب والهشاشة
فى العظام!
إيه دا
دا إيه؟!
بقى دا كلام؟!!!
أنا مش عاجبنى!
أنا قصدى ده؟
ولا يكون
عكس الكلام؟!!!
لاء مش حأقول
خبى إنكسارك
ولو ه أقول
قولى روح
ياعم خوفت الأنام
أو حتى روح
وأعمل دماغ
وبعد منها تعالى قولى
يعنى إيه معنى الكلام؟!
بقى ده كلام؟
أخبى إيه؟
إيه ولا إيه؟
وأخبى ليه؟!
مش كفايه مستخبى
جوه نفسى؟!
ونَفَسِىِ زعبِب
خضني وقاللي التزام؟!
مش كفايه
أشيل فى همى؟
وأعمل إيه
لو يوم نجح فيا انهزام
جاى تقول..
خبى إنكسارك؟!
ياعم سبنى اهرب قوام