حلمت بيكى
يا ستى وأنتى
زى بدر
فى ليل تمامُه
بتشعى ضى
فيه
رحابة
فيه نضوج فكر وتحدى
حلمت بيكى
وقلت خير
لينا زمان
ما شفنا خير
يرضى زمانى
عليا تانى
وأشوف حبيبتى
وأنول مرامى
والله خير
حلمت بيكى
عليا جايه
وفيكى فرحة
تملا كون
عاصرة حضنى
بين ضلوعك
مش بخوف ولا مستحية
زى ما تقولى كده
لاقيه..لِقيه
أو زى ما يكون الغياب
ما بينا عَوْقْ
له زمان
جذر فُرقه
ما صابه مد
جيت عليكى
وجيتى ليا
المهم لقينا بعض
واللُقىَ
يشبه هدية
أحضنينى
ياللى
غايبة معاك سنينى
أحضنينى
قبل حلمى
فيك ما يخلص
وألقى
غُربان النهار
جايه ترازينى
حلمت بيكى
بتهزى فيا
وتقولى عيد الوصال
نعيد
كل الأفاعى
اللى ف جحورها
تعزيم رفاعى
يهد حيلها
النوم يضر
والصحوة
عيد
حبيبى
ياللى
رحت ف منامك
سنين طوال
ليلك غريب
وبكره راحل
مهما طال
حلمت بيكى
وقلت خير
لينا زمان
ماشفنا خير
يرضى زمانى عليا تانى
وأشوف حبيبتى
وأنول مرامى
والله خير