لا تنبش الجرح يا وجهٍ براه الغياب
ما عاد بين الحنايا منزلٍ يندهل
ولا عاد ف النفس حيل ومتسع ل العتاب
وجدي على طول بال وخاطرٍ مسفّهل
تفرّقت سبلنا بين الخطأ والصواب
ولا تلاقت خطانا ف العجل والمهل
تدري وش آشدّ من طعن القنا والحراب
لا أمسيت يابو الحكم .. وأصبحت يابو جهل
تشوفني سمح في قولي وليّن جناب
وتقول مدري متى سحاب فعلك يهّل ؟!!
حتى تساهلتني وأغلظت لي فالخطاب
ما تدري إن الحكي جرحه ماهوب بسهل
كان السنين المقافي ما عطتك الجواب
ما علمتك الحياه بشي غير الجهل
ما كل موقف يبي له فعل يابو الشباب
ل القول وقت وأهل .. والفعل وقت وأهل
وإليا بلغ منك شكّك مبلغ الإرتياب
لا شفت وجه القشر وقّف ورّحب وهلّ
مبطي وأنا عن محاريفك عقلت الركاب
يوم أنت توّك بضوضاء العمر مستهّل