ظلمت نفسي وظلم النفس شيٍ كبير
يا ربّ أعنّي على نفسي وهوّن عليّ
أحنّها من قليل وتبتليني كثير
لين أخجلتني ذنوبي وأثقلت كاهليّ
أيوب صبري ينازع في نفسه الآخير
وسادات عقلي تخاصم مع رعاع جهليّ
والظنّ يبني بي أمالٍ مداها قصير
والواقع يهدّها .. مشكور ومجمّليّ
شاب إنتظاري وأنا أرقب كل صبحٍ بشير
مدري متى غيمة أحزاني تبا تنجليّ
متجوّدٍ ف الأمل حتى لو إني كسير
أب آتشالا معه .. لو كان ماني شليّ
أذوّب الليل في بوحي شعورٍ مرير
وأستعذبه وأشربه ويموت في داخليّ
وآساير الوقت مكره مير عيّا يسير
أحيان أحثّ الخطا وأحيان على مهليّ
تطيح من عيني أحلامي وهي زمهرير
وتذوب من لفحةٍ نيرانها تصطليّ
كم قلت يا نفسي الدنيا رحىً تستدير
ولا ظنّ به قلب من جور الليالي خليّ
(قصر النظر) ما يقصّر في يدين المصير
(وبعد النظر) ما يعديني لمستقبليّ
أضرب بكف الجمايل ما عرفت آستخير
وما ضاع عند الآوادم محتسبه الوليّ
الباطل أظلم من إحساس الحقود الحقير
والحق نوره يشّع إب كل وجهٍ جليّ
يا ربّ عفوك ولطفك يالعزيز القدير
صحايفي من تفاصيل الليالي مليّ
يا ربّ ضاقت بي الحيلات كيف أستنير
تقطّعت كل سبلي ما حدٍ لدّ ليّ
قبل العمر لا يجرونه بسلك الحرير
والحلم يصبح حقيقه وأنزل بمنزليّ
بحماك أجرني وأعنّي يا معين ومجير
ولا تكلِني على نفسي وجهد عمليّ