جيت الغريب وْجهاتي معمعه والدرب مهجور
أعيش حالة ضياع، ولا اهتديت إلّا لْضلالي
أهيم، والبيد يحضنّي تعب قيعانها البُور
إحترت يا دنيتي، هذا المدى شاسع وخالي
وحدي وليلي طويل السُهْد هذا الكون ديجور
لا عين تجزع، لا رمش اهتز، لا قلبٍ يبالي
عمري قضى والشقا بْوجه السعادة بانياً سور
يعني كثر ما السنين تْطول، عمر السور عالي
أنا كثر ما أرتجي عيشٍ هَنيّ، أعيش مقهور
كن الفرح: ضيّ سربه عابر: إلّا من خلالي
تعبت قابع بسجن الواقع اللي ممتلي جور
كم مرني ليل حزنٍ؟ كم من أحزاني بقالي؟
غلطت يا واقعي، جيت بْأمل يملاني غْرور
أبني طموحي، وصبري صامد بْوجه الليالي
وهبَّت رياح الشقا تْطيّر غصون وْتنزع جْذور
ملكني الياس، ضاق الكون، ضاقت بي آمالي
أصبحت غارق بموجة أسئله والفكر محصور
وشلون يا دنيتي: تْشّحي عليّ بْكل غالي؟
وشلون وسط البشر عايش بلا معنى ولا دور
لا موطن يْضمّني، كنّي كذا: مخلوق جالي؟
ضاقت بي الأسئلة ما به إجابة وانطفي النور
كل الإجابات عجْزِت، تاهت بْحيرة سؤالي
ومادام به درب يحضن خطوتي يفتح لها عْبور
بمشيه، لو كان دوّامه ويهديني لْضلالي