كيف انام ؟ وكلّ ما حطيت راسي ع المخدّه
صاح حلم وقال: فينك كلّ هذا الوقت عنّي ؟!
قلت: شفني في مهبّ العمر وظلال المكدّه
ما لقيتك ف الحياة و صرت اعيشك بالتمنّي
قال: منّي؟ قلت: منّي! والندم إحساس اعدّه
إنكسار وكان يتهشّم بصدري وانت منّي.!
إنتظرني عند باب الياس، والّا بأرض شِدّه
وافتكرني ب الأمل لا طالت دروبك وظنّي
طال ليلي والأرق ما طاح لي نجمه مودّه
عن حزن قلبي اشمّر ضيقتي واسطى اغنّي
شاعرٍ لا اغرورقت عينه شعور و باح سدّه
زفّ للحاجه حياه ، ولا ندب حظه تعني
في زجاج البرد يكتب رجفة التايه ولدّه
قلبه المكسور من ياما و ياما، وامتحنّي.!
ينقر الشبّاك صبح، وينخذل ف القلب مدّه
ما على صمتي سلام وحشرجة صوتي تونّي
كيف انام ؟! وكلّما حطيت راسي ع المخدّه
طاح حلم، وجفّ نبع العين من كحل التمنّي