بتوصفني بخليِّ البال
وانا اللي من ضفاير الليل
رسمت الغنوة والموال
ولو تعرف قد إيه قلبي
بيفرح لما بيشوفها
ولما اسمع لضحكتها
باقول حتى اللي مابينقال
وفي الآخر بتوصفني
وفي الآخر ماتعرفني
وهيه اللي خلتني
رسمت الغنوه والموال
وتوصفني بخليِّ البال!
ليالي كتيره بتعدي
ياخدني الفكر ويودي
وباحلم إني باقابلها
وأصدق إنها عندي
واطير من فرحتي بيها
واعيش في سحر لياليها
وفي الآخر بتوصفني
وفي الآخر ماتعرفني
وهيه اللي خلتني
رسمت الغنوه والموال
وتوصفني بخليِّ البال!
بالاقي الورد في خدودها
تاخدني نسايمه بوجودها
ولما باشوفها تتبسم
ولما اسمعها تتكلم
باحس كلامها ميت غنوه
بيحلا لقلبي ترديدها
وفي الآخر بتوصفني
وفي الآخر ماتعرفني
وهيه اللي خلتني
رسمت الغنوه والموال
وتوصفني بخليِّ البال!
قولولها امتى حاتصدق
بأني في العيون باغرق
وإني للزهور عاشق
وعايش بالهوى رحال
قولولها انها عمري
وساكنه ف قلبي وف فكري
قولولها إني باهواها
وقلبي للقا ميال
قولولها ليه بتوصفني
قولولها ليه ماتعرفني
وهيه اللي خلتني
رسمت الغنوه والموال
وتوصفني بخليِّ البال!