اعذريني يا حروف الأبجدية

اعْذِريني يا حْروفِ الأبْجَدِيِّة إذا ما بَعْمُلِ الواجِبْ عَلَيِّي

خْسِرِتْ خَيِّي اللِّي مِفْضل عَ اوْلادي وْعَلَيِّي

مِتِل إمِّي وْمِتِل بَيِّي

خَمِس ٍاعات صارْ لُو .. مِشْ زْيادِة

ما حالُّو يِبْتِدي النِّسْيان فيِّي

بْعزا خَيِّي رْجِعِت

عَزِّي فؤادي .. لأنِّي

بِعْتِبِرْ كِلّ شخْص مِنْكُنْ،

بَعْد ما مات خَيِّي، مْحَلّ خَيِّي

وْياقَلْعِة بيتْمِرِي الْ ما بْتِجْهَليني

أنا إبْنِك وْإنتِ بْتَعِرْفيني

حِمِلْني والْدي مْنِ الشُّوف خِلْعَة وْنَقَلْني

مِنْ مَدينِة عَ مَدينِة

خْلِقِتْ بِجْدَيدْتِك وطْلِعِتْ طَلْعَة

تَشِفْت الشَّمْس أوطى مِنِ جْبيني

وْمِنِ الشِِّعَّار !!

كَمْ شَلْعَة بِشَلْعَة مِشُو خْواريف عَ شْمالي وْيَميني ..

ياقَلْعِة بيت مِري ..

لَوْ ألْف بَلعة عَطَيتي لَ لِتْحَدَّاني بْعَريني

لَ لِتْحَدَّاني بْعَريني

لَ خَلِّي الصَّوْت

مِن قَلْعَة لِ قَلْعَة .. يِدْوي

مِتِل قِنْبِلْةِ الْ فَجَرها الأميرْكانْ

بْهيروشيما الحَزينِة

وْيا سِنْةِ الْواحِد وْسَبْعينْ

كُوني الْحَكَم بَيْن القَساوِة والْلُّيونِة

اسْهَري، عَ جَوقْةِ الْمَرْحوم، معْنا

مِتِل ما بْتِسْهَر الأرْض الحَنُونِة

وْياموسى بَعْد ما المِشْرِفْ

جَمَعْنا .. وْعَطَيْناكُنْ عَ عَََشْرِ شْهور مُونِة

الْمُونِة خِلْصِتْ

وْنِحْنا رْجِعْنا اطْلُبوني يا يَتامى

بْتوجََدوني

اشْبَعُو ..

نِحنا قَبِلْ مِنْكُنْ شْبِعْنا

الْبِسُونا بْصِدِرْكُن

قونِة وْقونِة

احْصِدوا .. نِحْنا كَرامِتْكُنْ زَرَعْنا ..

اعْتَدْتُو تاكْلُوني بْلَيْل أعْمى ..

وْعَلى صْياحِ الدُّيوك

بْتِنِكْروني

وإذا بالْمِشْرِف، بْآخر قَصيدِة،

خَتَمْ موسى عَلَيِّي

مِشْ بْعيدِة

أنا تْنازَلْت عَنْ حَقِّي وْعَطَيْتُو

وْعَ ذَوْقُو بَلَّشْ يْصِفّ الجَريدِة

وْعِنْد ما، بْآخِر الجَوْلِة، لَقَيْتُو

عَم يْدَبْدِبْ مِتِل طِفْلِة وَحيدِة ..

عْصَرْتْ دَمَّاتْ عاطِفْتي

وْسَقَيْتُو ..

لَقَيْتِ الضَّرْب أغلى مْنِ الطّريدِة

نَفَخْ حالُو .. عِنْد ما انْكَبّ زَيْتُو ..

وْشَمَخْ بو الْحِنّ

بِجْناحُو النّبيدي .. وْبِدي يْعَرِّمْ عَلى أطْفال بَيْتُو

مِتِل مِطْرِبْ بِإيَّام الْحَصيدِة

وْ تَ يِتْخَلَّصْ مِنِ غْرورو

دَعَيْتُو

عَ هالْحَفْلِة .. عَ هالْعَرْكِة الجّديدِة

اشْهَدُو عْلَيِّي .. وْ عَ هالْحَكْي الْ حَكَيْتُو ..

عَ إيْدي تِحْرَم دْفوف الِمْعَنَّى

إذا ما بْبَّوِّس الْمَغْرور إيدي

وْيا أنْصار الزَّجَل والْعَبْقَرِيِّة

ضَروري تْناصْرُو موسى

عَلَيِّي

لأنُّو بَعِدْ بَدُّو كْتير يِطْلَع تَ يوصَل عَ السَّماوات الْعَلِيِّة

ضَروري تْزَقّفولو بْكِلّ مَطْلَع ..

ضَروري يْشُوف جَنْبُو

الأكْثَرِيِّة

ضَروري عَ عْيونُو الضَّو يِطْلَعْ ..

صَلاة الصِّبِح أفْضَل مِنْ عَشِيِّة

أنا ناطِرْ خَمير الشِّعْر يِطْلَع

ما راحْ بِفْطَر عَلى لِقْمِة طَرِيِّة

وْإذا خِلْقي عَلى موسى بْيِطْلَع

تَ إهْدُم طُور موسى عَ حَراجِل

وْقَبِل يارينغ إنْهيلُو الْقَضِيِّة.

يا موسى ..

الحَظّ قَدَّمْلَكْ هَدايا .. وْبنالَكْ بَيْت عَ الأربَع زَوايا

نَصيبَكْ .. ماتْ نِسْرِ الأوَّلاني الْ كَساكُن عِنْد ما كِنْتُو عَرايا

وْنَصيبَكْ ما الْتَقَيْنا بْجَوّ تاني

تَ تِحْتَكِّ الشَّظايا بِالشَّظايا

وْنَصيبَكْ ..

بَعْد ما فِضْيُو القَناني لَقَيْتَكْ مِن بَقاياهُنْ بَقايا

أنا ..

لَمَّا الوَطَنْ كِلُّو دعاني تَ غَنِّي

بالمَدايِنْ والْقَرايا

كَرامِة عَيْن وِلْفي الأسْمَراني

ما سَفَّهْت الشَّباب وْلا الصَّبايا

وْقَبِل ما الدُّرّ يِخْلَق عَنِ لْساني

لْبِسِتْ بَدْلِة زَغاليل النَّوايا

وْرِياشي ..

بَيْن أرزِة وْسِنِدْيانِة إذا بْيِتْنَفَّضُو بْيِبْنُو سَرايا!

عَطَيْت الشِّعْر، مِنْ روحي، مَعاني

صَرَخ لِبْنان: يا نِعْم الْعَطايا

وْإذا بْسَجِّل بِصَوْتي إسْطوانِة عَ صخْر الصَّم ..

بيصَفِّي مَرايا

أنا يوسِف .. أنا ألله اصْطَفاني .. أنا مْرَبِّي

الْمَحى بْدَمُّو

الخَطايا

وْإذا موسى سْمِيَّك

عَ زماني بْيِجي

تَ شَلّحُو لَوح الْوَصايا (28 .

يا زَيْن شْعَيْب يارِكْنِ الْمَباني

وْيا بِنْ حَمْدان ياصَقْر المنايا

وْإنِت يا حَرْب

ياخَزْنِة مَلانِة

لا تِهْتَمُّو بِتَحْليل القَضايا

أنا وَحْدي .. إذا بِسْرُجْ حِصاني

بِسِرْجو بْكَتِّف الأرْبَع مَطايا

وْعَناصِر جَوق موسى الكسِرْواني

الْ عَشِيِّة شَرَّفُو أربَع فَوارِسْ

عَ بُكْرا بْيِرْجَعُو أربع ضحايا.

الحواشي والشروحات

في ظهيرة ذاك اليوم توفي الأخ الأكبر للشاعر جوزيف الهاشم ولم يعتذر عن المجيء إلى المهرجان.

إشارة إلى تفاخره بليونته ونعومة خطابه مقارنة مع قسوة موسى زغيب وحِدّة خطابه، الذي لَمَّح إلى ذلك أيضاً (وْما جايي بْرِفْقِةِ الزَّغْلول إكْبَر عَ أحْلام القساوِة واللِّيونِة).

الشاعر الذي يختُم اللقاء هو الرَّابح.

عندما يكون الطَّير صغيراً يراه الصياد أغلى من طلقته فيعزف عن اصطياده.

إشارة إلى خليل روكز الذي كان الجميع يكنُّون له كلَّ الاحترام والتقدير.

النَّبي موسى بن داوود.

(28لوح الوصايا العشر للديانة الموسوية.

حرب .. هو إدوار حرب من الجوقة أيضاً. يقوم أعضاء الجوقة عادة بتحليل ما يقول الشاعر الخصم وتلخيص بعض النقاط بسرعة كبيرة وتقديم النصائح الفورية لرئيس جوقتهم.

موسى زغيب من بلدة حراجل في قضاء كسروان .