نلعن ابو هالحظ..ونقول له تب
تبّت..يدينه حظ..خايب ولعّاب!
على هواه.. وعكس ماقلت له هب
بعد الرجا والخوف.. ودّى ولا جاب!
عزّاه يا جرحٍ..نما بداخلي وشب
تطيب منه النفس.. والقلب ماطاب
قلبً سطت فيه المشاعر بعد حب
ظنّه على طول الرجا والزمن خاب
ذنبه اذا سيقت حروفه ماهو ذنب
شيٍ كِتب له..فالمعاليق بكتاب
وانا ادري ان الحب ماهو بينسب
لكن لي شرهه على القلب وعتاب!!
ماضاقت الدنيا.. بعيني ولي رب
يفتح لعبده من بعد ضيقه ابواب
واللي يكب الناس.. لابد.. ينكب
من لا يحسّب فالغلا ماله حساب!!!