أضغاث الأقلام ما تعني بحور الخليل
ودّك بتقليدها .. ولاّ بتجديدها
ل أخطت قناعتك منها ما عطتك الذبيل
ولا ينفعك بين خلق الله ترديدها
وأنا عطيت القوافي كل صدرٍ جزيل
وألبستها عقد عجزٍ زان به جيدها
كله لعين الوفاء يوم الوفي ما يميل
قطفت عذب المشاعر من عناقيدها
حبيبتي كل جرحٍ من يدينك جميل
الله يكثر جروحي منك ويزيدها
واللي عطاك الحلا وأعطاك طرفٍ كحيل
إن أجمل أيام عمري معك يا عيدها
تمرجحي وسط قلبي جعل عمرك طويل
وإستمتعي بالحياة اللي على قيدها
خلي همومك تغادر حان وقت الرحيل
فكّي قفول الحنايا وأطلقي قيدها
وأنا بما يسعدك ويسرّ عينك كفيل
ياللي عليك الليالي طال تنكيدها
أردّ طرف المواجع عن جنابك كليل
وآغيض الأيام في ضحكتك وآكيدها
لا تحسبين السعادة ما تجي بالقليل
أحيان الأشياء تكمل عند تجريدها
من (فيمتو الثانيه) في كيميا احمد زويل
شوفي صغار الأمور وعُظم تمجيدها
شالت زمول المحبّه كل حملٍ ثقيل
والناس بتموت ما خلّت مناقيدها
اللي يعرف الأمل ما يعرف المستحيل
وحراير الفكر ما ترضى بتعبيدها
قالوا قبل (كن جميل تشوف كلش جميل)
وأنتي جمال الحياة اللي على قيدها