يا سود الأيام هاتي ما بقى .. هاتي
لا تذخرين لعناي وضيقتي حاجه
ما يثني الوقت عزمي دون غاياتي
والله وعد عبده المهموم ب إفراجه
أصحابي اللي قصروا من دون هقواتي
رفعتهم عن مقام العذر وإحراجه
عنهم تعذرّت لي وأحسنت نيّاتي
وألبستهم من بياض الظن ديباجه
فقدي ل الأصحاب في عزّ إحتياجاتي
مثل إفتقاد المريض الطبّ لعلاجه
ما دامني ما وفيت بكل حالاتي
ليل المشاريه كيف أولّع سراجه
عداني اللوم .. لا عدّت ملاماتي
راسٍ عسره الزمان وضاق مخراجه
غير القناعه شعورٍ ما ملى ذاتي
معه أتعفّفّ عن اللي كنت محتاجه
تغيّر الناس .. ما غيّرت عاداتي
ما يخلف الأصل وقتٍ عقّد حجاجه
لا غرّبتني طبوعي لذت بسكاتي
أعزّ لي من كثير الهرج وإزعاجه
وإليا إستوى وجه حسناتي وسيّاتي
يمكنّي أرضى بعدها كل منعاجه
مع ضيق الأيام طولي يا مسافاتي
خلي ضعيف العزوم يعاود أدراجه
أنا تشهّدت .. من بعد التحياتي
وأوكلت أمري إلى الله قاضي الحاجه