اشربي من جم عيني ترى ماها قراح
لا تخيلين السحابه ولا ربانها
لو يموت الورد وتشلهبه هوج الرياح
ما تموت الجمره الي فجر بركانها
لا تحسبين الاحاسيس شي مستباح
النفوس اليا تقادت رقص شيطانها
كيف ابى اعطيك السموحه وانا اطلبك السماح
ما تعديك المعاذير غير سمانها
شيعي حزنك تراني على خف وجناح
الليالي ما عطتني على ميزانها
ما يكف الليل الاسود سوى شمس الصباح
ادخلي دروازة القلب مع بيبانها
لا يذيرك اشقر الريش يا ضبي البراح
لو تمعنت الحقيقه عرفت الوانها
لا تحاربني بعينك ترى فيها رماح
لا توردنا المنيه على ذرعانها
من بسط في فيّ صدرك فراشه واستراح
ما شكت له ضيقها النفس من حرمانها
ما تعوضنا المقادير والي راح راح
نارها تونس لهبها قبل دخانها
اثر حر الشوق يثر على كل الجراح
ودي انسى ضيقة الصدر بين احظانها