القطر فاتك يا وله
وانت على طرف الرصيف
شايل على كتافك حمولة متلتلة
تقدر بقى.. لو كنت شاطر تلحقه
عدي على كتب التاريخ
واحكي الحكاية لأي شيخ... أو أي دجال تعرفه
واقطع رقبته ان قال لذنبك مغفرة.
هي الوحيدة اللي في ايدها المعذرة.
تقدر تسامحك لما تمسح دمعها
وتطيّب الجرح اللي نازف.. من غباوتك..
.. وبقساوتك كنت زارعه في قلبها.
والقطر فاتك يا فِتِك
لو كنت شاطر تلحقه.. ما هي أصلها
ماتت وهي مدمعة.. ودموعها باصة للسما
زعلانة منك!!!... أو عليك!!!
رب العباد أعلم بها.
رب العباد أرحم بها.
ما هي دي اللي كانت بالحنان.. أرحم عليك.
من نفسك اللي بين إديك
دلوقت قابلت ربها.. والدور عليك
والقطر فاتك.. يا ضعيف
ورينا حل المعضلة
وانت على طرف الرصيف
شايل على كتافك حمولة متلتلة
تقدر بقى..
لو كنت شاطر تلحقه؟؟
وتروح لها
وتبوس إديها ورجلها..
يمكن بطيبة قلبها ترضى عليك
يمكن بطيبة قلبها ترضى عليك