ما يغركيش

ما يغركيش

لو يوم شافتني عنيكي هادي ومبتسم.

وبجد يعني.. انا مش طايقني.

بقيت خانقني.

واجيب لروحي ضغط دم.

وف كل يوم.. بابلع هموم.. من كل لون

واتمنى حد يهفه عقله يقوم سارقني..

.. وعقله يملاه بالعشم.

ويروح مزود في الغشم

يطلب جنيه واحد..

.. ولو مغسول في جيب البنطلون

أو حتى شارب لتر جاز

وساعتها يبقى يشد دقني

لو لقى أي اهتمام

تسونامي لما شافني قاطع سكته..

.. اتبرجل ونام

فبلاش يا حلوة تغلطي.

وف بحر وهمك تنزلي.. وتبلبطي.

وتفكري ف ساعة عبط

تتشعبطي في الصلعة دي..

.. وتبكبكي بحبة كلام

وترصصي لك كلمتين حلوين لذاذ

أنا أصلي متعود ضروري كل يوم.

أفطر نكد.

وأشق ريقي بشقتين مطحون إزاز

وامضغ وراهم حتتين كسر الرخام

ما تهزنيش حبة قصايد يا مدام.

وحياة مقام اسم الإشارة، والاستعارة،

والكناية، والمجاز.

بلساني كانوا بينحتوا صخر الهرم

فما تسمحيش لشيطان عبيط يورطك

ويغلطك.

أحسن ورحمة اسمه إيه.. اللي انت فاكراه.. حبنا

لتعضي كعبك م الندم

ما يغركيش

لو يوم شافتني عنيكي هادي.. ومبتسم.