ياه.. ياااا منااااااار..!!!!!!!!
يا نجمة راسمة دربها
وبعِندها ثابتة برغم الشمس في عز النهار
مليون مدار
بيزغللوا عنيها ورافضة أي توهة وأي خطوة في محاوي الاندثار
يا نشوة الحلم اللي بعت العمر في رسمه..
.. وكان اسمك دليلي أو دليله في اختيار الدرب وصعوبة القرار
والقلب لو مليان ثقة بيوم اللقا
ينسى المرار
ما تصدقيش
ضوء الحقيقة بيختفي
ما تفكريش الضلمة دايمة..
... مهما ليل الزور عِفي وغطى النهار
واللي بيهرب م العطش
لو يوم شرب كل المحيط.. لا بيرتوي.. ولا يكتفي
والكدب إدمان للدمار
له بهرجة وخلطة عجيبة محوجة بسبعين بهار
ودموع بصل
بتسيل مع تكة زرار
يا نبض قلبي اللي اتخنق.. في سنين بوار
رغم اختلاف الرؤية بعشق خُلفنا
لو حتى كان هيضمنا مليون حوار
يا حتة مني لما كنت زماااان أنا
يا أحلى بكرة حلمت به.. شامخ..
.. ما يعرفش انكسار
يا نجمة راسمة دربها
وبعندها ثابتة برغم الشمس في عز النهار
يااااه يااا منار..!!!
يا شعرة في راسي بتتحدى التصحر والبوار
بكراكِ جنة شوفتها في عنيكي مفروشة ازدهار