دمٍ يسيل.. بخنجرٍ ماله أسباب
لحظة غضب تَنهي وجود البرايا
العالم اللي شفت أنا فيه ماهاب
موتٍ وجوع وناس، والله عَرايا
وزلازلٍ هَزّت سلاطين بعقاب
وكْوارثٍ.. منها تْدوخ الدهايا
احدٍ.. يخمه من قسى الوقت مخلاب
واحدٍ.. يعمّر له قصور وقرايا
وحنّا العرب صرنا نعادي للاقراب
وذاك العدو في القدس سوى سوايا!
يقتل غدر.. يقتل بلا قدر وحساب
وش عاد.. دام انّا عليهم عَمايا!
شَرّد هَدم دورٍ بلا ستر وحجاب
كسر عظم طفلٍ ويتم صبايا!
طيش العدو ماله عن الحق طٰلّاب
ما تنتصر بالسلم، أم القضايا
حَل القضيّة ما هو بيد الأجناب
يا كيف وهم الأصل ساس الخطايا!
حكامنا.. دم العرب ماهو تراب
سكوتكم هو من كبار الرزايا
يا كيف نرضى الظلم لإخوان وأحباب
أرواحنا ذا اليوم خير العطايا
من أولٍ بالسيف تَخضع لنا أرقاب
الفاتحين.. إن كان جيش وسرايا
حطين ويا القادسية والأحزاب
على العدو ذل وخراب وشظايا
واليوم بنت القدس تَصرخ بلا أعصاب
المعتصم، ويلاه حنا سبايا
تَصرخ على الشاشات من كرب وأنشاب
وقلبٍ تفطّر بين عكف الحنايا
لا صار ضعف الدين لابدّنا أذناب
لا صار ضعف الدين حنا ضحايا
يا دمعةٍ تاقف على روس الأهداب
عيّت تطيح وترتضي بالنهايا
يردها برموش عينه ولاهاب
طفلٍ.. يروم اليوم حوض المنايا
بيده.. حجر يرمي عدوٍ لنا خاب
أمن الحجر سوى لنفسه خَبايا
شعب العرب والله به خير منصاب
لكن بلانا اللي لغيره رعايا