خذ مابدالك وأعطني مابدالك
دام ان قلبي عند قلبك رهينه
شعوري وشعري تراها حلالك
والقلب خفقاته فداك وحنينه
ماينحسب من عمري الاوصالك
واللي بقى مابنشد الريح وينه
مير انت لا تدني دليْك وحبالك
الٌا لقلبٍ زارعك في وتينه
الله على سطوة بهاك ودلالك
وروضك وجوريّه وياسمينه
ماكنك الا النجم في ليل حالك
والا السحاب وبارقٍ في جبينه
لك في شراييني شعوب وممالك
ياساكن شمال الخفوق ويمينه
تعال في موكب يليق بجمالك
ل واهبك قلبه وروحه وعينه
وان رحت أبد ماني مدور بدالك
حتى لو انه يكسف الصبح زينه
كيف اعتذر من قلبي اللي وفالك
وشلون اغيّر دفته عن ضنينه
ومنين اجيب احساس وانت ب لحالك
اخذت احاسيسن تكفّي مدينة
يعوضني عن حب غيرك خيالك
القلب مستسلم ورافع يدينه
وش له بكيفٍ ماتحوفه دلالك
لو زعفرانه بالذهب مشترينه
قلبٍ مع الصدة بقى في مجالك
مايرخص الغالي ويرخص ثمينه