حبيبتى.. كل ما لا يمكن وْيستحيل..
يهون لْعيونك اللي ما لْسواها يهون
يا وجهة الفكر لامن تاه وأوضح دليل
يا شمعة العمر وانتي راحتي والسكون
يا مقاسمتني أماني وقت جدّاً بخيل
ما بين شكٍ يساورنا.. وصدق الظنون
لا خيّم الياس في كوني في عينك أخيل..
برق التفاؤل.. وبسماتك تهل بْمزون
ولْيا همستي.. أحس بْكل شيٍ جميل
بقولتك: (بكره الأفراح تعزف لحون..
بكره تهل البشاير مثل شمس الأصيل..
وأحلامنا تْصير واقع.. به تُسرّ العيون)
كلامك يزيح همّي.. كنه السلسبيل
يشعل طموحي وللصعبات لي خير عون
حبك.. ولا غير حبك.. يستحيل البديل
لولاك مدري "محمد" واقعه وش يكون
تهون كل المصايب.. لكن المستحيل..
فرقاك يا أغلى البشر.. هذا لا يمكن يهون