جيت ياليل المشاعر بالشعور السامي
جيت قلبٍ يعزف أحزانه بأرق لحونه
جيت متغرب ابرمي للدورب أقدامي
دون راي يقودها.. تمشي كذا مغبونه
يامتاهات الصحاري وش بقى قدامي؟
صرت متشرد بغربه.. ماغدت مأمونه
كل مااتحدا التعب واشعل طموح إقدامي
كل درب مصيب توقف خطوتي من دونه
هذي ايامي وانا اللي من عرفت ايامي
في دهاليز التقاويم العبث مسجونه
كني المولود لجل أبقى رهين اوهامي
وكني الموجود في كونٍ ولاهو كونه
من عرفت أحلم وانا أحلامي سبب ل ألامي
ومن عرفت الدمع ماارضي اعيش بدونه
ومن عرفت الفرْح نبع وكل عرقٍ ضامي..
في حشاي وياسي الجاير هداني طعونه
كل ماضاق الفضا صار الصبر هندامي
ماسواه.. الغارق بحزنه تراه عيونه
الحزين اللي الف مجبور وضعٍ دامي..
كل صبح يظن خيرٍ لو تخيب ظنونه
هذا انا ياواقعي شفني حزين عصامي
ماسواي احضن شقاي وعبرتي مصيونه
ماسوى لأوراق شعري بوح نزف اقلامي
من سواهم يفهموني همي يشيلونه؟