عايشت قومٍ وخالطت أجناس
قومٍ ماهم ب قومي ولا ناسي
غصت ب تجاربهم دون مقياس
بعزم وفكر وب طول انفاسي
حتى غدى بي العلم لباس
والعلم سيفٍ لو تبا عباسي
ما تسله على غير خناس
تقطع به رجى كل وسواسِ
وانا لو هقيت الجهل جلاس
اغير مجلسي ماطاح من ساسي
ما رضيت إلا على العز نوماس
ابوي وصاني ورفعت به راسي
احتذي به لي جار الزمن او ياس
هو قدوتي من بين هالناسِ
كلن ثمر على نوع الأغراس
احدٍ علا غرسه وحدٍ ينداسِ
يا انك توردها مواريد جساس
يا انك على هب الهوا مياسِ